الف / اولف من جزيل الفرايد
لعلنا نسلا بنظم القصايد
نرتاح من هم على القلب كايد
والجسم ذابل كنه العود والحاه
البا / بلينا في محبتك يا .....!
تزفر مشاعرنا من الظيم وتهيج
ماعاد نلقا من سبايبكم الريج
والقلب وقته كل مازان يشناه
التا / تولعنا بذكرى قديمه
والروح من سبة هواكم سقيمه
ونا معي للناس حشمه وشيمه
راح العمر والسد للناس بحناه
الثا / ثلوم الوقت يمك حدتني
وليا تناسينا رسايلك جتني
وانهار قلبي قبل ينهار متني
يالله ترحمني ليا حل طرياه
الجيم/ جار الوقت والله عليه
اسهر ليا نامت عيون الرعيه
اكفكف ادموعي براحة يديه
جارالزمان ومابقا شي نخشاه
الحا / حلفت ايمان ماجوز عنك
مشاعري عن باقي الخلق جنك
وانته على ماقيل لاهي بفنك
ارتعت من هم على القلب يمحاه
الخا / خذيت العقل والفكر مني
ماقد تهنينا والا انت امتهني
وكل المشاعر يم طيفك حدني
راحت تسابق يم داره ومرباه
الدا / دوا روحي لياشفت زوله
والا سكنا جنب داره وحوله
ناخذ مع المغرب على الزين جوله
يرتاح بالي له قبل ماتعداه
الذا / ذرفت الدمع غصب بلاطوع
لكن انا جايك بعد يوم وسبوع
ماعاد باقي للصبر في مشروع
جاوب ترا صبري تقاضا من اقصاه
الرا / ردوفه كنها رسم فنان
بان الحلا والزين في مقلته بان
انا اشهد انه موت للعقل وجنان
اخق مع صوته وفي نبرة احكاه
الزا / زهاه العنق والطول والكف
شعره على المتنين نازل ومنكف
لاهبت النسمه تلاعب وكفكف
رميتني في مقبل العمر واتلاه
السين / سال الدمع من موق عيني
ياليت اشوف ايديه تلوي يديني
ارتاح من همي وماضي سنيني
متى حبيب القلب والروح نلقاه
الشين/ شاب الراس والفكر شايب
والعين تذرف دمع والعقل ذايب
واخاف من فوقي تحط النصايب
جاب المرض حبه ولاطيق فرقاه
الصاد / صبري ياجماعه توالا
على الذي مثل البدر لاتلالا
بعد العشق ننساه والله محالا
اريج عطرك كيف يالريم ننساه
الضا /ضروفه ماتوافق ضروفي
ومن البكا صوتي تدانا وشوفي
ياليت كفه ياسعد في كفوفي
اسهر مع الذكرى وبالصوت ننعاه
الطا /طلع لي من حبيبي رساله
ونسيت لانشد ياهلي عن حواله
والا عن الي بالضماير نساله
راح العمر والي بلا الزين يبلاه
الظا / ظهرت برجم شامخ وعالي
وجلست مع همي وغمي لحالي
وخيل دار معزبي بالشمالي
وحالي الي راح والهم يبراه
العين / عايف من شرابي وزادي
مغير ادور له وبالصوت انادي
وخاف عن دناي قرب شدادي
راح الزمان ومابقا شي يخفاه
الغين / غابت شمس يوم الربوعي
هذي سنه فاتت ومعها سبوعي
ماشفت زولك ياحسين الطبوعي
امرن مقدر لي عسا الله يجلاه
الفا / فرض حبه وعشقه عليه
مابرت في حبه ولا بار فيه
لكن ديار الزين باتت خليه
رحل ونا عايش لحبه ورجواه
القاف / قال اسمع وخلك فطيني
احذرا تمر اديارنا ماتجيني
متى يديك تحطها في يديني
يرتاح بالي وانت شانيك تنساه
الكاف / كلمني بعدها صديقه
يقول شف لك حل والا طريقه
قدام لاتولع وتصبح حريقه
جاك الخبر واحذر يشوفونك اعداه
اللام/ ليلي ياعرب ماقويته
اتصور المزيون واخيل بيته
الصاحب الي بالمحبه شريته
القلب متولع بحبه وذكراه
الميم / مرينا بهجر وقطيعه
ومن سبته ضاقت علي الوسيعه
والله لو طال الهجر مانبيعه
رسم على كفي علامه بيمناه
النون / نابت حبها وسط قلبي
احرق شراييني وناره تشبي
ولا تهنينا وحظي لعبي
لعب علينا الحظ والهم شفناه
الها / هني الي يشوفه بعينه
ويعيش تالي العمر واتلا سنينه
والا يناظر ياسعد في جبينه
جمال محبوبي من العرق وجناه
الواو / وين الي خذا القلب مني
عساه مستانس معه ومتهني
عشان ادندن بالفرح له وغني
ارتج من صوته ليا قال لباه
اليا / يمر اصويحبي في منامي
اشوف زوله كل مانمت امامي
يوضي جبينه مثل بدر التمامي
يازين محبوبي ويازين ملفاه