ماني لغير الله راغب ومحتاج
الي كفل رزقي من اول وتالي
ومالي عن المعبود مله ومنهاج
عليه نجوايه وفيه اتكالي
ويالعبد لو كانك على بير هداج
مرتاح في رزقك وشربك زلالي
والا معمر لك بنايات وابراج
والا من اصحاب الرتب والمعالي
لابد من يوم/ن بلا طب واعلاج
يوم/ن عن الدنيا تشد الرحالي
ومن حولك عيالك لهم صوت لجلاج
وتحين شمسك يالفتى للزوالي
ويشاد لك بيت/ن بلا باب وادراج
بيت/ن بلا سيسان جرفه هيالي
بنوه وترابه سريرك وديباج
في جنب صحصاح/ن من الناس خالي
عايش وسط ظلمه بلا نور واسراج
وحيد ماحولك ونيس وعيالي
اليا دخلته ماحصل منه مخراج
صكو عليك الباب ياهملالي
ولو كانت ذنوبك ورى ساحل العاج
تجيك لاحدك وتلقى السؤالي
عمرك قضيته مع سواليف وازعاج
ماخفت من ربك رفيع الجلالي
تسعى ورى الدنيا بلا هم واحراج
واليومه ذنوبك سوات الجبالي
وياحظ من نومه تعاليل واسهاج
يسهر مع المعبود تالي الليالي
عينه تهل الدمع يدعيه ويناج
وغيره شبع بالنوم والفكر سالي
واعداد من جوله زياره وحجاج
واعداد ماهلت مزون الخيالي
نبيكم صاحب رساله ومعراج
صلو على الهادي كريم السبالي