خل القصائد من عنا الحر ترتاح
تاخذ لها غفوه وترجع عليه
وياوقت طاوعني بعد سدنا باح
جاني من الدنيا بلاوي قويه
من اول خلي وفالي ولا راح
اسعد بشوفه واهتني في مجيه
وان ماسمع صوتي قبل نومته صاح
يخشى زعلنا والعلوم الرديه
واليا تقابلنا على ضحك وامزاح
كنه من المولى كتب لي هديه
واليوم جتنا القوم باسلاح وارماح
وخلت ليالينا السعيده شقيه
اهل الفتن معها مناقير واجناح
وبالكذب والفتنه بلتنا بليه
قالت ترا سلطان من بنتكم ناح
وياخذ علاجه من هل الصيدليه
وانتم هل العزه شرفكم ليا طاح
تبقون هرج الناس صبح وعشيه
دارو شرفكم واسمعو كل نصاح
يخشى عليكم من كلام الرعيه
ومن بعدها حطو حراسات واسلاح
وصعبت مواصيل الخوي مع خويه
وامسيت كني ذيب في جنب صحصاح
لا نامت العربان يقنب عويه